လရဲ့အ​ဝေးက လူ

အဝေးက "လ"
ဝေးလို့ လှတာလား
ငေးလို့ လှတာလား

ဝေးလို့ပဲ လှလှ
ငေးလို့ပဲ လှလှ

သေချာသည်က
ထို "လ"
ကျွန်တော် "တ"တိုင်း မရ။

ကိုစိုင်းငယ်(တောင်ကြီး)

ငြမ်း​ပေးတဲ့လမ်း

‘‘ဟဲ့… ကိုအောင်တင် ဆုံးပြီတဲ့”
‘‘ဟယ်… ဖြစ်မှဖြစ်ရလေ။ ဘာဖြစ်တာတဲ့လဲ”
‘‘အစာအိမ်သွေးကြောပေါက်တာကို အချိန်မီ မခွဲနိုင်လို့ဆိုလား”
‘‘ကလေးနှစ်ယောက်တော့ ဒုက္ခပါပဲဟယ်”
‘‘လိမ္မာတဲ့ ကလေးတွေကျတော့လည်း ကံဆိုးလိုက်တာနော်”

ကျူးကျော် ရပ်ကွက်တစ်ခုရဲ့ မီဒီယာ တစ်ခုလုံး ခေတ်အစားဆုံး သတင်း တစ်ပုဒ် ဖြစ်သွားတယ်။ ကိုအောင်တင် ဆိုတာ ဘာမှမကြီးကျယ် မခမ်းနားတဲ့ ဆိုက်ကားသမား တစ်ယောက်ပါ။ ဆိုက်ကားသမား တစ်ယောက်သေတာ ဒီလောက်ကြီး အုတ်အော်သောင်းတင်းဖြစ် ရတဲ့ အကြောင်းရင်း ရှိတယ်လေ။ အဓိကကတော့ သူ့ရဲ့ ကလေး နှစ်ယောက်ကြောင့်ပါ။ ကိုအောင် တင်တို့လင်မယား ဒီရပ်ကွက်ကို စရောက် လာတုန်းက လင် ကိုယ် မယားနှစ်ယောက်တည်း။ ဘယ် အရပ်ဘယ်ဒေသကမှန်း တိတိ ကျကျ ဘယ်သူမှမသိကြဘူး။ ထုံးစံ အတိုင်း နေစရာမရှိလို့လွတ်တဲ့ နေရာလေးမှာ တဲထိုးပြီး နေဖို့ ရောက်လာကြတာ။ ဒီရပ်ကွက်က လူတွေ အကုန်လုံးလည်း ဒီလိုချည်းပဲလေ။ နောက်တော့လည်း ချက် မြုပ်လို ဖြစ်သွားကြတဲ့သူတွေချည်း ပါပဲ။

မိန်းမက အငယ်ကောင်လေး ကို မွေးပြီး မီးတွင်းထဲ မှာတင် ဆုံးသွားတာ။ ကိုအောင်တင် ခမျာ နှစ်နှစ် သမီးလေး နဲ့ လသား အရွယ် သားလေး ကို ထိန်းရတာ တစ်ဖက်၊ ဆိုက်ကားနင်းရတာ တစ်ဖက်နဲ့ တော်တော်ကြီး ကို ကသီခဲ့တာကိုး။ ကိုအောင်တင်က ဖအေမို့ လို့ မွေး တယ်လို့ နာမည်တပ်ရပေမဲ့ တကယ်တမ်းကျတော့ ရပ်ကွက်က အိမ်ပေါက်စေ့ ဝိုင်းထိန်းတာ များ ပါတယ်။ ခုဆို အကြီးမလေးက (၇) တန်း၊ အငယ်ကောင်လေးက (၅) တန်းတောင် ရောက်နေပေါ့။

အဲဒီလို အချိန်ကျမှ ကိုအောင်တင်က ဆုံးတယ် ဆိုတော့ ကလေး နှစ်ယောက် ဒုက္ခရောက်ပြီပေါ့။ သာမန် ဆိုရင်တော့ လူတွေက စုတ်သပ် ရုံနဲ့ ပြီးသွားမှာပါ။ ခု ကလေးတွေက ရပ်ကွက်က ဝိုင်း မွေးထားလို့ သံယောဇဉ် ဖြစ်နေကြ တာကတစ်ဖက်၊ ကလေးတွေက ရုပ် ရည်လေးတွေ သန့်သလို ထူးထူးခြားခြားလိမ္မာပြီး အနေ အထိုင် သိမ်မွေ့ကြတာ တစ်ချက် ကြောင့် ဝိုင်းကရုဏာ သက်နေကြ တာလေ။
ခက်တာက ဘယ်လိုပဲ ကရုဏာ သက်သက် ခေါ်ပြီးမွေး ထားနိုင်လောက်အောင် ချောင်တဲ့ အိမ် တစ်အိမ်မှ မရှိဘူး။ ဒီရပ်ကွက် မှာ ကိုအောင်တင် တို့အိမ်က သား သမီး အနည်းဆုံးပဲ။ ဒီတော့ ကရုဏာ သက်ရုံလောက်ပဲ တတ် နိုင်ကြပေမပေါ့။

ကိုအောင်တင့် အသုဘကို ရပ်ကွက်က တာဝန်ယူပြီး သင်္ဂြိုဟ် လိုက်ကြတယ်။ ရက်လည်ပြီးတော့ ကလေးနှစ်ယောက် နဲ့အတူ ပဲပြုတ် သည် အပျိုကြီး မအေးဆင့်ကို ရပ်ကွက်အစီအစဉ်နဲ့ နေစေလိုက် တယ်။ ကလေးတွေက ကျောင်းမှာ အဆင့် တစ်၊ နှစ်၊ သုံးဝင်အောင် စာတော် ကြပေမဲ့ မတက်ကြရတော့ ဘူး။ ရပ်ကွက်ကလည်း သူတို့ဘာ သာသူတို့တောင် မနက်စာညစာ အလျဉ်မီအောင် မနည်း ရှာစားနေ ကြရတဲ့ သူတွေချည်း မဟုတ်လား။ သူတို့မောင်နှမ ကတော့ ဝမ်းရေး အတွက် ဟင်းသီးဟင်းရွက်လေး တွေ၊ ရာသီ စာလေးတွေ ဆန်ကော ထဲထည့်ပြီး လှည့်ရောင်းကြရတာပေါ့။ ဟိုအိမ်က ဟင်းလေးပေး၊ ဒီအိမ်က ထမင်းလေးပေးနဲ့ အဆင် ပြေသလိုပါပဲ။

ကလေးတွေရှေ့ရေးကို ဦးနှောက်ခြောက်နေသူ ကတော့ ရပ်ကွက်လူကြီး ဦးမောင်ခင်ပဲ။ သူက စဉ်းစား ချင့်ချိန်တတ်တဲ့သူ ဆိုတော့ ကလေးတွေဟာ ဒီလို အခြေအနေမျိုးနဲ့ ဘဝကို ရေရှည် ဖြတ်သန်းလို့မရဘူး ဆိုတာ သူ တွက်ချက်မိတယ်။ နောက်ပြီးတော့ ကလေးတွေက ရုပ်ရည်အသန့် လေးတွေ။ သူတို့ပညာတော်ပုံက အပံ့ အပိုးကောင်းလိုက်ရင် မြင့်မြင့် မားမားဘဝကို ပိုင်ဆိုင်နိုင်ကြမယ် ဆိုတာ ခန့်မှန်း မိတာကိုး။ ဒါပေမဲ့ သူကိုယ်တိုင် ကလည်း တောင်မင်း မြောက်မင်း မကယ်နိုင် အခြေအနေ ဆိုတော့ ကလေးတွေအနာဂတ် အတွက် ဘာလုပ်ပေးသင့်တယ် လို့ အမြဲစဉ်းစားနေမိတော့တာပဲ။

ဒါကြောင့် လိုလိုမည်မည်လို့ သဘောထားပြီး ကလေးတွေရဲ့ လိမ္မာတဲ့ သတင်းကို တွေ့သမျှ လူတိုင်းဆီမှာ ကြော်ငြာဝင်တဲ့ အလုပ်ကို မှန်မှန် လုပ်ခဲ့တယ်။ သူက ပလတ်စတစ် ဘူးခွံ၊ ဘီယာ ဘူးခွံ၊ စက္ကူအဟောင်း၊ သံတိုသံစ တွေကိုကောက်တဲ့ဒိုင် ဆိုတော့ ရပ်ကွက် တကာ လှည့်နေတဲ့ လူစုံ နဲ့ ဆက်ဆံနေရတော့ ပိုပျံ့နှံ့တာပေါ့။

‘‘ဦးမောင်ခင်…ဗျို့… ဦးမောင်ခင်”

တစ်ရက်မှာ ရပ်ကွက်ထဲက ရေစည်တွန်းတဲ့ ထော်ဦးက အူယားဖားယားနဲ့ ပြေးလာတယ်။

‘‘ကလေးနှစ်ယောက်ကို ဟိုဘက် ရပ်ကွက်ထဲက ပဲကျော်ဖို ပိုင်ရှင်က မွေးစားချင်လို့တဲ့ဗျ”

ဦးမောင်ခင် ရင်ထဲမှာ ထိတ် ခနဲဝမ်းသာ သွားတယ်။ ကလေးတွေ အကြောင်း သူများတွေကို ဖြန့်ဝေ ခဲ့တာ ဒီလိုဖြစ်လာဖို့ တိုက်ရိုက်ကြီး မရည်ရွယ်ပေမဲ့ တစ်မတ်သားဖိုး လောက်တော့ မျှော်လင့်ပြီး လုပ်ခဲ့ တာမဟုတ်လား။

‘‘ဟေ…ဟုတ်လား၊ ဘယ် လိုပြောလို့လဲ၊ သေသေချာချာ ပြောစမ်းပါဦးကွ”

ဦးမောင်ခင် ပျာပျာသလဲ စိတ်ဝင်စားပုံပြတော့ ထော်ဦး လည်း ပြောအားရှိပြီပေါ့။

‘‘သူတို့လင်မယားက အရာ ရာပြည့်စုံနေပေမဲ့ ကလေးမရနိုင် ဘူးတဲ့ဗျ။ ကလေး ရူးရူးနေတာကို ကျုပ်က သိတော့ ရေသွားထည့် တိုင်း ကလေးတွေ တော်ကြောင်း၊ သနားစရာ ကောင်းကြောင်းကို နေ့တိုင်းပြောတာဗျ။ သူတို့က မွေးစားဖို့တော့ အစီအစဉ် ရှိတယ်။ ဒါပေမဲ့ မျိုးရိုး မသန့်မှာလည်း စိုးရိမ်ပုံရတယ်ဗျ။ ဒီကလေးတွေ ကျတော့ အဖေအမေက ဆင်းရဲ ပေမဲ့ နာမည်ပျက်မရှိတော့ နည်း နည်းစိတ်ပါ ပုံရတယ်။ ကျုပ်က လည်း ကလေးတွေရဲ့ ဇာတ်နာပုံ တွေကို စီကာပတ်ကုံးပြောပြတော့ စိတ်ပါ သွားပုံရတယ်ဗျ။ ဒါပေမဲ့ နှစ်ယောက် စလုံးတော့ မွေးချင်စိတ် မရှိဘူးတဲ့။ ခွဲခေါ်ရင် ကောင်းပါ့ မလားလို့ ပြောတယ်ဗျ။ ကျုပ်က လည်း ကလေးနှစ်ယောက် စလုံး ဆင်းရဲနေ တာနဲ့စာရင် တစ်ယောက် ကောင်းစားသွားလည်း မနည်းဘူး ဆိုပြီး ရတယ်လို့ပြောခဲ့တယ်”

‘‘အေး…ကောင်းတယ် ထော်ဦး။ အဲဒီတော့ သူတို့က ဘာပြောလဲ”

ဦးမောင်ခင်က တံတွေး အတင်း မျိုချပြီး အငမ်းမရ မေးပါ လေရော။ ထော်ဦးက

‘‘ခင်ဗျားနဲ့လာတွေ့ပြီး ကလေးတွေကို ကြည့်ဦးမယ်တဲ့ဗျ”

ဦးမောင်ခင်က သူ့ပေါင်ကို သူ လက်ဝါးနဲ့ဖြောင်းခနဲနေအောင် ရိုက်ပြီး ပြုံးပြုံးကြီးတွေးနေလိုက် တာ။ ထော်ဦးက ပြန်တော့မယ်  လို့ နှုတ်ဆက်တာတောင် ပြန်မပြော နိုင်ဘူး။

ကလေးနှစ်ယောက်ကို ပဲကြော်ဖိုက သူဌေးလင်မယားက မွေးစားတော့မယ်ဆိုတဲ့အကြောင်း ဟာ ရပ်ကွက်ထဲမှာ ပျံ့သွားတယ်။ ဦးမောင်ခင် လည်း သတင်းမေးသူ တွေကို ပြန်ကြားရေးလုပ်နေရတာ နားကို မနားရဘူး။ ကလေးနှစ် ယောက်ကို ဦးမောင်ငယ် က ခေါ် ပြော တယ်။

‘‘သူတို့က တစ်ယောက်ပဲ မွေးစားချင်တာတဲ့ကွ။ ကံကောင်း တဲ့သူ ပါသွားမှာပဲ။ ဘယ်လိုလဲ။ မင်းတို့ မောင်နှမနှစ်ယောက်ကရော ခွဲနိုင်ပါ့မလား”

ကြိုတင်မေးထားမှ ဖြစ်မှာလေ။ ပဲကြော်ဖို သူဌေးလင်မယား လာရင် သူက ယာယီ အုပ်ထိန်းသူ အနေနဲ့ တရားဝင်အောင် လုပ်ပေး ရမှာကိုး။ ကလေးတွေရဲ့သဘော ထားကို အရင်သိထားမှဖြစ်မှာ မဟုတ်လား။ တော်ကြာ အားလုံး ပြောဆိုပြီးမှ မလိုက်ချင်ပါဘူးဆို ခက်ဦးမယ်။

ဦးမောင်ခင် အဲဒီလိုပြော လိုက်တယ် ဆိုရင်ပဲ မောင်နှမနှစ် ယောက်က မျက်လုံးလေး ကလယ် ကလယ်နဲ့ တိုင်ပင်သလို အပြန် အလှန် ကြည့်နေကြတာ ဘာစကား မှ ထွက်မလားဘူး။ တော်တော် ကြာတော့မှ အစ်မလုပ်တဲ့သူက

‘‘နှစ်ယောက်စလုံး ခေါ်ပါလို့ ပြောလို့မရဘူးလား ဦးလေးရယ်” ဆိုပြီး တောင်းပန်တဲ့ အသံမျိုးလေး နဲ့ ပြောတယ်။ ဦးမောင်ခင်က

‘‘အဲဒီလိုတော့ ပြောမှာပေါ့ အေ။ ဒါပေမဲ့ တစ်ယောက်ပဲ ခေါ် သွားချင်တယ် လို့ ဖြစ်လာရင် ဘယ်လိုလုပ်မလဲ ဆိုတာ ကြိုတင် စဉ်းစား ထားရမှာလေ။ မခွဲချင်ဘူး ဆိုရင်တော့ အစကတည်းက အပြတ်ပြော ထားရမှာပေါ့။ ဒါပေမဲ့ သမီးတို့ကို ဦးလေးပြောချင်တာက ရပ်ကွက်ချင်းလည်း သိပ်ဝေးတာ မဟုတ်ဘူး။ ဘယ်သူ့ကိုပဲ ခေါ်သွားခေါ်သွား လိုက်သွားသင့် တယ်လို့ ထင်တယ်။ နှစ်ယောက် စလုံးက ပညာတော်ကြတော့ ကျောင်း ဆက်တက်ရင် ထူးထူးချွန် ချွန်ဖြစ်မှာ သေချာတယ်ကွဲ့။ သမီး ကလည်း အရွယ်ရောက် လာပြီ ဆို တော့ အုပ်ထိန်းသူ မရှိဘဲ အလွတ် အကျွတ်ကြီးနေလို့ မကောင်းတော့ ဘူးလေ။ တစ်ယောက်ကောင်းစား ရင် တစ်ယောက်ကို ကြည့် လို့ရ တာပေါ့အေ”

ဦးမောင်ခင် စကားက ငြင်း လို့မရပေမဲ့ မောင်နှမနှစ်ယောက် စလုံးကို တွေဝေစေခဲ့တာ အမှန်ပဲ။ သူတို့ ဦးနှောက်လေးတွေ နဲ့ မတွေး တတ်တော့တဲ့ အချိန်မှာ ဖြစ်လာ သမျှ လျောက်လျားပဲ လို့ သဘော ထားပြီး ဘာမှမစဉ်းစားတော့ ဘူး။

နောက်သုံးရက်လောက်နေ တော့ သူဌေးလင်မယားရောက် လာပြီး ဦးမောင်ခင်နဲ့တွေ့တယ်။ ကလေးတွေနဲ့ တွေ့မပေးခင် ဦးမောင်ခင် က ကလေးတွေ အခြေ အနေကို ပြောပြပြီး နှစ်ယောက် စလုံးကို မွေးစားဖို့ တွန်းတိုက် ပြောတာပဲ။ သူဌေးလင်မယား က လည်း မြေစမ်း ခရမ်းပျိုး ရမှာဆိုတော့ နှစ်ယောက်ကြီး မမွေးချင်ဘူး။ ဘယ်လိုမှ ပြောလို့ မရတော့ သူတို့ ထိုက်နဲ့ သူတို့ကံ ဆိုပြီး ကလေးနှစ် ယောက် နဲ့ ခေါ်တွေ့ပေးလိုက် တယ်။

ကလေးတွေကို မြင်လိုက်တာ နဲ့ သူဌေး လင်မယားရဲ့ မျက်နှာဟာ မေတ္တာဓာတ်တွေနဲ့ ဝင်းလက် သွားလိုက်တာ။ ဘေးက အကဲ ခတ် နေတဲ့ ဦးမောင်ခင်တောင် အဆင် ပြေပြီ ဆိုတာ တန်းသိလိုက်တယ်။ ဒါပေမဲ့ ဘယ်သူ့ကိုရွေးမယ် ဆိုတာ က ပဟေဠိပဲ။ ဦးမောင် ခင် ရင်ထဲမှာ ဘုရားစာတွေ ကျိတ်ရွတ်ပြီး နှစ်ယောက်စလုံးကို ခေါ်သွားပါစေ လို့ ဆုတောင်းလိုက်ရတာ။ သတင်း ကြားလို့ လာရပ် ကြည့်သူတွေက လည်း တစ်ရပ်ကွက်လုံးနီးပါးပဲ။

အဲဒီအချိန်မှာပဲ သူဌေး ကတော်က

‘‘သားတို့ သမီးတို့က အန်တီတို့အိမ် မှာရော နေချင်ကြရဲ့လားဟင်” လို့ ချိုရွှင်နေတဲ့ အပြုံးမျက်နှာနဲ့ မေးလိုက်တယ်။ ဒီလိုမေး မယ် ဆိုတာ ဦးမောင်ခင် သိပြီးသားလေ။ ဒါကြောင့် ကလေးတွေကို ကြိုသင်ပြီးသား။ အကြီးမလေးက

‘‘ဟုတ်ကဲ့ နေချင်ပါတယ်ရှင့်။ အိမ်အလုပ်တွေကိုလည်း ကူလုပ် ပါ့မယ်။ လိမ်လိမ်မာမာနဲ့ စကား နားထောင်ပြီး စာလည်း ကြိုးစား ပါ့မယ်ရှင့်”

ပြီးပြီပေါ့။ ဦးခင်မောင်သင် ထားတဲ့အတိုင်း ကွက်တိပဲ။ သူဌေး လင်မယားဆိုတာ ကလေးမလေး ကိုဆွဲဖက်ပြီး နမ်းတော့မယ့်အတိုင်း ပီတိတွေ ဝေသွားလိုက်ကြတာ။ ပြီးတော့ ကောင်လေးကို ဆက်မေး တယ်။

‘‘သားကရော…ပြောပါဦး”
ဦးမောင်ခင် ရင်တွေတဒိန်း ဒိန်းခုန်လာတယ်။ သူဌေးကတော် မေးနေပုံက တစ်ယောက်ရွေးမယ့် ပုံစံနဲ့မှ မတူတော့တာ ကိုး။ နှစ်ယောက် စလုံးကို သွေးသက်ပြီး ခေါ်သွားရင် ဘယ်လောက်ကောင်း မလဲလို့ တွေးလိုက်မိတယ်။ အဲဒီ အချိန်မှာ ပဲ ကောင်လေး ဆီက ဘောက်ဆတ်ဆတ်ဖြေသံ ထွက် လာတယ်။

‘‘ကျွန်တော်ကတော့ မနေချင်ဘူး။ ကျောင်းလည်း မတက်ချင်ဘူး။ ကိုယ့်ဘာသာကိုယ် ဈေးပဲရောင်း ချင်တယ်”

ဦးမောင်ခင်ခေါင်းကို မိုးကြိုး ပစ်လိုက်သလိုပဲ။ သင်ထားတုန်းက ဒီလိုမှမဟုတ်တာကိုး။ ဒီကလေး ဘာဖြစ်လို့ ဒီလိုပြောလိုက်တာလဲ။ အကြီးမလေးကလည်း ထင်မထား တာဆိုတော့ ပါးစပ်အဟောင်းသား ပေါ့။

နောက်ဆုံး ရလဒ်ကတော့ ဘာဖြစ် ရဦးမှာလဲ။ သူဌေးလင် မယားက ကလေးမလေးကို သမီး အဖြစ် မွေးစားဖို့ ခေါ်သွားတယ် ဆိုပါတော့။ ဦးမောင်ခင်လေ .. ဒေါသဖြစ်လွန်းလို့ ကောင်လေးကို ရိုက်မိမလိုတောင် ဖြစ်သေးတယ်။ ရပ်ကွက်ထဲက လူတွေအကုန်လုံး လည်း ကောင်လေးကို တစ်ယောက် တစ်ပေါက်ဝိုင်းပြီး ဆူလိုက်ကြ၊ ငေါက်လိုက် ကြတာ ပွက်ပွက်ကို ညံလို့။ ကောင်လေး ကတော့ အလယ်ကောင်မှာ ခေါင်းငိုက်စိုက် လေးချပြီး မျက်ရည်တွေ တွေတွေ ကျလို့ပေါ့။

ကရုဏာဒေါသောနဲ့ ဝိုင်း ပြောကြတဲ့ လက်ပံပင်ဆက်ရက် ကျသလို အသံတွေ များလွန်းလာ တော့ ကောင်လေးက တစ်ခွန်း တည်း ထပြော လိုက်တာ ပါးစပ် အဟောင်းသားနဲ့ အကုန်တိတ် ဆိတ်သွားတော့တာပဲ။ ကောင် လေးငိုသံပါကြီးနဲ့ ပြောလိုက်တာက
‘‘သူတို့က ကျွန်တော့်ကိုပဲ ခေါ်ချင်တယ်ဆို မမတစ်ယောက် တည်း ကျန်နေခဲ့မှာပေါ့ဗျ” တဲ့။

သက်ဦးမောင်

ရတီမဂ္ဂဇင်း ရသဝတ္ထုတို
http://yatimagazine.com/archives/19008

ပီယဆေး

လူဖြစ်လာခိုက်
စိတ်ယုတ်ပယ်ကာ
ရှင်သန်ပါမူ
ရန်သူနည်းပါး
ခင်(ချစ်)သူများမည်။

ကိုစိုင်းငယ်(တောင်ကြီး)

ချစ်သောတွမ်အင်န်ဂျယ်ရီ

Photo - google image

ငါဟာ 
ငါမဖြစ်ခဲ့ဘူးဆိုရင်
တွမ်အင်န်ဂျယ်ရီ ဖြစ်ချင်တယ်။

ဘယ်သူကလိုက်လိုက်
ဘယ်သူကပြေးပြေး
အားလုံးကိုအပြုံးဆေး ကျွေးနေရရင်
ပြတ်သွားတဲ့လက်တွေ ပြန်ဆက်မယ်။
ကွဲသွားတဲ့ခေါင်းတွေ ပြန်ကောင်းမယ်။
ဆယ်ပေါင်တူကြီးနဲ့ထုပြီး 
ပုသွားတော့လည်း ပြန်ရှည်မယ်။

နာကျင်ရလွန်းလို့
ထွက်သွားရတဲ့ကြယ်တွေလည်းပဲ
ပြန်လည်ချိတ်ဆွဲတောက်ပမယ်။

တွမ်အင်န်ဂျယ်ရီဆိုတာ
အမြှောက်ထဲထည့်ပစ်ခံရပြီး
ပြန်လာနိုင်ကြတဲ့ သူရဲကောင်းတွေပဲ။

သုခမိန်လှိုင်

ကဗျာနှင့်စကားပြောခြင်း

ကဗျာက
ကျွန်တော့ကိုမေးတယ်။

ခင်ဗျားက
ကဗျာဆရာလား တဲ့။

??? ??? ??? ??? ???

??? ??? ??? ??? ???

ကျွန်တော် မဖြေဘူး။

----- ----- ----- -----

----- ----- ----- -----

ကျွန်တော် 
သူ့ကိုပြန်မေးလိုက်တယ်။

ကဗျာဆရာဟုတ်မှ
ခင်ဗျားကို 
ကျုပ်က ရေးရမှာလား။

ကဗျာဆရာဖြစ်မှ
ခင်ဗျားကို 
ကျုပ်က ချစ်ရမှာလား။

??? ??? ??? ??? ???

??? ??? ??? ??? ???

သူမဖြေဘူး။

----- ----- ----- -----
----- ----- ----- -----

ကျွန်တော် ... မဖြေ
သူ ... မဖြေ
ဒါဆို...
ကျေပြီပေါ့ ကဗျာ။

ကိုစိုင်းငယ်(တောင်ကြီး)

သူငယ်ချင်း ``ms´´အတွက်

တစ်ချိန်က 
အဲဒီနေရာလေးမှာ
ကျွန်တော် ရှိခဲ့တယ်။
ပြီးတော့.....
အဲဒီနေရာလေးမှာ 
သူလည်းရှိခဲ့တယ်။

အခု...
အဲဒီနေရာလေးမှာ
ကျွန်တော် မရှိတော့ဘူး။
သူလည်းမရှိတော့ဘူး။

အဲဒီနေရာဆိုတာ...
ကျွန်တော်ရော သူရော 
ပျော်ခဲ့ဖူးတဲ့နေရာ။

ကျွန်တော်သီချင်းဆိုတဲ့အသံ 
သူသီချင်းဆိုတဲ့အသံတွေ 
ရောနှောပျံသန်းခဲ့ဖူးတဲ့နေရာ။

ကျွန်တော့ခံစားချက် သူ့ခံစားချက်တွေ
ဖွင့်ဟအန်ထွက်ခဲ့တဲ့နေရာ။

----- ----- ----- -----
----- ----- ----- -----

သူတီးခတ်ခဲ့ဖူးတဲ့ ဂစ်တာကို
ကျွန်တော် မေးကြည့်တယ်။

``သူ ငါနဲ့မင်းကို သတိရနေလိမ့်မယ်လို့
မင်းထင်လား´´ဆိုတာပေါ့။

ဖုန်တွေအထပ်ထပ်ကပ် 
ပင့်ကူမျှင်တွေတက်နေတဲ့ဂစ်တာက 
ကျွန်တော့ကို ခေါင်းခါပြတယ်ထင်ပါရဲ့။

(စိတ်အထင်ကိုပြောတာပါ။
အသက်မဲ့ ဂစ်တာဆိုတာ
တီးခတ်တဲ့ အခါ
အသံမြည်ပြရုံကလွဲပြီး ဘာပြန်ပြောနိုင်ပါ့မလဲ။)

ကျွန်တော်ကတော့ 
သူနဲ့သူရေးစပ်ထားတဲ့
ကဗျာတွေ စာတွေကိုသတိရတဲ့အကြောင်း
သူ ကျွန်တော့ဆီက ငှားဖတ်ဖူးတဲ့
ရယ်စရာမဂ္ဂဇင်းစာအုပ်ကို
လှမ်းပြောလိုက်တယ်။

----- ----- ----- -----
----- ----- ----- -----

သူငယ်ချင်း ``ms´´ ရေ.....
နင် နဲ့ ငါ...
အဆက်အသွယ်ပြတ်ခဲ့တာ
လေးနှစ်လောက်ရှိသွားပြီထင်ပါရဲ့။

ငါ.....
အဲဒီနေရာလေးကို
ညနေတိုင်း အပြေးရောက်သွားတယ်။
(စိတ်ကူးနဲ့ အတွေးနဲ့ပေါ့ဟာ)

ငါထင်ပါတယ်။
နင်လည်း အဲဒီနေရာလေးကို
စိတ်ကူးနဲ့ အတွေးနဲ့ 
မကြာခဏ အလည်ရောက်သွားမယ်ဆိုတာ။

----- ----- ----- -----
----- ----- ----- -----

အခု.....
တစ်ခြားမြို့ရဲ့တစ်နေရာမှာ
ကျွန်တော် ရှိတယ်။

တစ်ခြားသောမြို့ရဲ့တစ်နေရာမှာ
သူ ရှိနေတယ်။

----- ----- ----- -----
----- ----- ----- -----

သူငယ်ချင်း ``ms´´
အမြဲပျော်ရွှင်နိုင်ပါစေ။
အစစအရာရာ အဆင်ပြေပါစေ။
အေးချမ်းသာယာရှိပါစေ။

ခင်မင်သတိရလျက်.....

ကိုစိုင်းငယ်(တောင်ကြီး)
22.08.2015(9:57PM)

ရှိတ်စပီးယားအကြောင်း သိကောင်းစရာ

Photo Credit - Unknow

ယခုနှစ် ၂၀၁၆ခုနှစ်ဟာ ရှိတ်စပီးယားကွယ်လွန်ခဲ့တဲ့နှစ် (၄၀၀) မြောက်နှစ်ဖြစ်တဲ့အလျောက် ကမ္ဘာတစ်လွှားမှာ ရှိတ်စပီးယားနဲ့ပတ်သက်တဲ့ပွဲတွေအမျိုးမျိုးလုပ်နေကြတာကို သတိထားမိမှာပါ။ ယခုဆောင်းပါးမှာတော့ ရှိတ်စပီးယားနဲ့ပတ်သက်တဲ့လူသိနည်းသေးတဲ့အကြောင်းအရာတစ်ချို့ကို ဗြိတိသျှကောင်စီရဲ့ Facebook မှာ မေးမြန်းထားတာတွေကို ဗဟုသုတအဖြစ်ဘာသာပြန်ဖော်ပြလိုက်ပါတယ်။


ဂရိတ်ဗြိတိန်နိုင်ငံက ကျောင်းတွေမှာ ရှိတ်စပီးယားပြဇာတ် ကပြတာမျိုး ရှိပါသလား၊ ဒါမှမဟုတ် စာသင်ရုံ သက်သက်ပဲလား။ ခေတ်ပေါ် အင်္ဂလိပ်စာနဲ့ရော ဘာသာပြန်ကြပါသလား။


ပြဇာတ်ကတာနဲ့ ပတ်သက်လို့ကတော့ သိပ်များများစားစား မရှ်ိပါဘူး၊ ဒါပေမဲ့ မိတ်ဆွေပြောသလိုဘဲ ကျောင်းတွေအားလုံး  ရှိတ်စပီးယားကို မသင်မနေရ ပုံစံနဲ့ သင်ရိုးညွှန်းတမ်းများ ပြဌာန်းထားပြီးတော့၊ လေ့လာရင်း ပြဇာတ်ရဲ့ ဇာတ်ဝင်ခန်းတစ်ချို့ကို သရုပ်ဖော် တင်ဆက်တာကို ကြည့်ကြတာမျိုးတွေ လုပ်ကြပါတယ်။ Shakespeare Schools Festival လိုမျိုး ကျောင်းပေါင်းစုံ ရှိတ်စပီးယားပွဲတော်ကို ပိုပြီး ကျယ်ပြန့်တဲ့ ပရိဿတ်တွေဆီရောက်အောင်နှင့် ကျောင်းသားတွေကို တိုက်ရိုက်ပါဝင် လှုပ်ရှားခွင့် ပိုမိုရရှိအောင် တစ်နိုင်ငံလုံး အတိုင်းတာ ပရောဂျက်ပုံစံမျိုးနဲ့ ကျင်းပကြတာ ရှိပါတယ်။

http://www.ssf.uk.com/ 

http://shakespeareweek.org.uk/


ခေတ်ပေါ်အင်္ဂလိပ်စာကို ဘာသာပြန်သလား 
ဆိုတဲ့ မေးခွန်းအတွက်ကတော့ ကျောင်းတွေမှာတော့ မူရင်းစာသားတွေကိုဘဲ အသုံးပြုပြီး ခေတ်ပေါ် အင်္ဂလိပ်နဲ့ ရှင်းလင်းချက် စာအုပ်စာတမ်းတွေ ပံ့ပိုးပေးပါတယ်။


ရှိတ်စပီးယားထက်ပိုပြီး အင်္ဂလိပ်ဘာသာနဲ့ စာပေအပေါ် သြဇာလွှမ်းမိုးခဲ့တဲ့ အခြားစာရေးဆရာများ ရှိပါသလား။


တိုတိုဘဲဖြေရမယ်ဆိုရင်တော့ မရှိပါဘူး။ ရာစုများစွာ သြဇာကြီးမားတဲ့ စာရေးဆရာ မြောက်များစွာ ပေါ်ထွက်ခဲ့ပေမဲ့ ဘယ်သူ့စာပေကမှ သူ့လိုမျိုး နေ့စဉ်သုံး ဘာသာစကားတစ်ခုရဲ့ ကြီးမားတဲ့ အစိတ်အပိုင်းတစ်ခုအဖြစ် မရောက်ခဲ့ပါဘူး။


ရှိ်တ်စပီးယားရဲ့ ပြဇာတ်တွေဟာ ပူဆွေးသောကတွေ ဒါမှမဟုတ် သက်ဉ်ီးဆံပိုင် ရှင်ဘုရင်တွေရဲ့ ဘဝဆိုင်ရာတွေ အကြောင်းတွေဘဲလို့ ကမ္ဘာက သိထားပါတယ်။ သူ့ရဲ့ အခြားလက်ရာတွေ ဥပမာ ဟာသနဲ့ အခြားအမျိုးအစားတွေ ရှိပါသလား။


ရှိတ်စပီးယားက ဟာသပြဇာတ်တွေ၊ သမိုင်းနောက်ခံတွေနဲ့ တေးကဗျာတွေ ရေးခဲ့ပါတယ်။ နောက်ပြီး တစ်ချို့ပြဇာတ်တွေ ဥပမာ The Tempest လိုမျိုး ပြဇာတ်ဆိုရင် ဘယ်အမျိုးအစားထဲမှာ ပါသလဲဆိုတာ ပြောရခက်ပါတယ်။ တစ်ချို့ကတော့ ပူဆွေးမှုတွေနဲ့ ဟာသ tragicomedies ဒါမှမဟုတ် အချစ်ဟာသ romantic comedies ဆိုပြီးအမျိုးမျိုးသတ်မှတ်ကြပါတယ်။ သူက ဟာသပြဇာတ်များစွာ ရေးခဲ့ပါတယ်။ သူ့ပြဇာတ်တွေကို အကြမ်းအားဖြင့် အုပ်စု သုံးမျိုးခွဲခြားနိုင်ပါတယ်။ historic သမိုင်းနောက်ခံ၊ tragedy ပူဆွေးသောကနဲ့ comedy ဟာသတို့ပဲဖြစ်ပါတယ်။ အဲ့ဒီအမျိုးအစားတွေကို ဒီမှာကြည့်နိုင်ပါတယ်။

http://www.opensourceshakespeare.org/views/plays/plays.php


ရှိတ်စပီးယားက compound noun တွေသုံးတဲ့ ပထမဦးဆုံး စာရေးဆရာဖြစ်ခဲ့တယ်လို့ ဖတ်ခဲ့ရပါတယ်။ အဲ့ဒါမှန်ပါသလား။


သူက compound noun တွေကို ပထမဆုံးသုံးခဲ့တယ်ဆိုတာ မဖြစ်နိုင်ဘူးလို့ ထင်ပါတယ်။ ဘာကြောင့်လဲဆိုတော့ compounding ဟာ ရှေးဟောင်းအင်္ဂလိပ်စာမှာတည်းက ရှိခဲ့တဲ့ လုပ်ဆောင်ချက်တစ်ခု ဖြစ်ပါတယ်။ ဒါပေမဲ့ သူက အင်္ဂလိပ်ဘာသာမှာတင် ကျန်ရစ်စေမယ့် compound noun အသစ်တွေ အများကြီး တီထွင်ခဲ့ပါတယ်။


ရှိတ်စပီးယားရဲ့ မျိုးဆက်တွေ ယနေ့တိုင် သက်ရှိထင်ရှား ရှိသေးလား။


မရှိပါဘူး။ သူ့ရဲ့ တစ်ဦးတည်းသောသားလည်း ကွယ်လွန်သွားခဲ့တယ်။ သူ့သမီးနှစ်ယောက်မှာလည်း တစ်ယောက်က သားသမီး မထွန်းကားခဲ့ဘူး။ နောက်တစ်ယောက်ရဲ့ ကလေးတွေလည်း အကုန်သေဆုံးသွားခဲ့တယ်။ ဒါဟာ ဝမ်းနည်းစရာဘဲပေါ့။ Elizabethan ခေတ်တုန်းက ပြဇာတ်လောက လူနေမှု ပုံစံက ပွင့်လင်းလွတ်လပ်တာမို့ သူ့မှာ အခြားတရားမဝင် ကလေးတွေ ရှိကောင်းရှိနိုင်ပါတယ်။ ဒါပေမဲ့ ခိုင်လုံတဲ့ သဲလွန်စ တစ်စုံတစ်ရာ မရှိဘဲနဲ့တော့ ဒီအချက်ကို အတည်ပြုနိုင်မှာ မဟုတ်ပါဘူး။


ရှိတ်စပီးယားရဲ့ စာအုပ် ဘယ်နှစ်အုပ် ထွက်ခဲ့သလဲ ပြောပြလို့ရမလား။


အားလုံးလက်ခံထားတဲ့ အရေအတွက်ကတော့  ၃၈ အုပ် (ပူးတွဲရေးသားထားတာ အပါအဝင်) ဖြစ်ပါတယ်။ ဒါပေမဲ့ ပြဇာတ်နှစ်ပုဒ်ဖြစ်တဲ့ King Edward III နဲ့ Sir Thomas More အပါအဝင် အခြားပြဇာတ်တွေကိုလည်း သူရေးခဲ့တာလား ဒါမှမဟုတ် ပူးတွဲ ရေးခဲ့တာလားဆိုတာ စူးစမ်းမှုလုပ်တုန်း ရှိပါတယ်။ အောက်မှာတော့ ဒီအငြင်းပွားမှု ဥပမာတွေ တစ်ချို့ကို ဝင်ကြည့်နိုင်ပါတယ်။

https://l.facebook.com/l.php?u=http%3A%2F%2Fwww.independent.co.uk%2Farts-entertainment%2Ftheatre-dance%2Fnews%2Ffake-shakespeare-play-double-falsehood-is-genuine-after-all-10167657.html&h=8AQGrXN4P


သူက အသက်ဘယ်လောက်မှာ ကွယ်လွန်ခဲ့သလဲ။


ရှိတ်စပီးယားက ၅၂ နှစ် အရွယ်အထိ နေခဲ့ပါတယ်။ ၁၆၁၆ ခုနှစ် ဧပြီလ ၂၃ ရက်နေ့မှာ သူကွယ်လွန်ခဲ့ပါတယ်။ သူ့ကို ၁၅၆၄ ခုနှစ် အဲ့ဒီရက်စွဲမှာဘဲ (၁၀၀ % တော့ မသေချာ) မွေးဖွားခဲ့ပါတယ်။


Credit - 
Myanmar Network Forum Moderator3

Open Source URL

http://www.myanmar-network.net/m/discussion?id=3423487%3ATopic%3A1476820